మిక్స్చ్‌ర్ - 03-03

పొరపాట్లో అలవాటు

"అదేమిటే పంకజం, నిన్న ఫంక్షన్‌లో మీ ఆయన నీ కూడా తిరుగుతూ ప్రతి ఐదు నిమిషాలకోసారి నీ నెత్తిన నీళ్లు చిలకరిస్తున్నాడు? అదేం ఆచారమే?
అక్కడ అడిగితే బాగోదని ఇవ్వాళ ఫోన్ చేస్తున్నా'' అడిగింది వనజాక్షి.
"ఆయన చల్లింది నా తలమీద కాదు - నా జడలోని పూలమీద. పూల కొట్లో కదా తను పని చేసేది'' నవ్వుతూ చెప్పింది పంకజాక్షి.

అదీ సంగతి
"నా భార్య రాత్రుళ్లు నిద్ర పోవట్లేదు డాక్టర్, ఏదైనా మందు రాయగలరా?'' అడిగాడు సుబ్బారావు.
"నిద్రపోకుండా ఏం చేస్తుంటుందో కనుక్కున్నారా?'' కూపీ లాగాడు సౖౖెక్రియాటిస్టు.
"నేను బార్‌నుండి వచ్చేదాకా ఎదురుచూస్తూ ఉంటుంది'' చెప్పేడు సుబ్బారావు.

తేడా!
"పులికీ మేకకీ తేడా చెప్పగలరా?'' అడిగింది టీచర్ అలివేలు.
"పులి క్రూర జంతువు - మేక కూర జంతువు'' ఠపీమని చెప్పేడు టింకూ.

దొంగొచ్చాడు!
రాత్రి సెకండ్ షిఫ్ట్ నుండి వచ్చిన భర్త ఇంట్లో కన్పించిన దృశ్యం చూసి నోరు తెరిచాడు. వెంటనే తేరుకుని "నీకసలు బుద్ధుందా? దొంగని కూర్చోబెట్టి కాఫీ ఇస్తావా?'' కయ్యిమన్నాడు.
"ఆ తొందరపాటే పనికిరాదు మీకు. వీడు దొంగతనానికి వచ్చింది మన పక్కింటికట'' తాపీగా చెప్పింది భార్య.

గుణమే మారునా!
"వాళ్ల ఆఫీసులో పని చేసే టైపిస్టు వెనకాల మీ ఆయన తిరుగుతున్నాడనే అనుమానం అసలు నీకెందుకు వచ్చిందే?'' అడిగింది జలజ.
"గతంలో ఆ పోస్టులో నేను పనిచేసి ఉన్నాను కాబట్టి'' చెప్పింది వనజ.

తిరగబడ్డ వాదన
"మీ క్లయింట్ తప్పు చేయలేదని ఇన్నాళ్లూ వాదిస్తూ వచ్చారు కదా. మరి ఇప్పుడేంటి అతను ఖచ్చితంగా నేరం చేసి ఉంటాడని అంటున్నారు?'' ఆశ్చర్య పోయాడు జడ్జి జగన్నాథం.
"4 నెలలుగా నా ఫీజు ఇస్తానిస్తానని ఎగ్గొడుతుంటే ఏం చేయమంటారు మరి?'' అసహనంగా బదులిచ్చాడు లాయర్ విశ్వనాథం.